Փետրվարի 10-ին Հայրենադարձության և ինտեգրման կենտրոնում, ՀՀ առողջապահության նախարարության հետ համագործակցությամբ, կայացավ տեղեկատվական հանդիպում, որը մեկ հարթակում համախմբեց Ֆրանսիայից, Ղրղզստանից, Ռուսաստանից, Բելառուսից, Կանադայից և Սիրիայից ժամանած հայրենադարձների։
Հանդիպման ընթացքում «Հանրապետական շտապօգնության ծառայություն» ՓԲԸ-ի բժշկական գծով փոխտնօրեն Էդուարդ Վարդանյանը, ինչպես նաև Առողջության համընդհանուր ապահովագրության հիմնադրամի ներկայացուցիչներ Տիգրան Հովհաննիսյանը և Նարեկ Խաչատրյանը ներկայացրեցին առողջության համընդհանուր ապահովագրության համակարգը, դրա նպատակներն ու ներդրման առանձնահատկությունները։
Ներկայացվեցին նաև ապահովագրական փաթեթում ներառված՝ անվճար կամ մասնակի վճարմամբ տրամադրվող ծառայությունների և դեղորայքի ցանկը, դրանցից օգտվելու ընթացակարգերը, ինչպես նաև շտապ բժշկական օգնություն ստանալու փոփոխված պայմանները։
Հանդիպման ավարտին մասնակիցները հնարավորություն ունեցան հյուրերին ուղղելու իրենց հարցերը։