Շարունակելով բուժհաստատությունների հետ հանդիպումների շարքը՝ հուլիսի 28-30–ն Առողջության համընդհանուր ապահովագրության հիմնադրամն առցանց աշխատանքային հանդիպումներ է անցկացրել հիմնադրամի հետ պայմանագիր կնքած բժշկական օգնություն և սպասարկում իրականացնող մարզային կազմակերպությունների տնօրենների և առողջության համընդհանուր ապահովագրության գծով պատասխանատուների հետ։
Հանդիպման նպատակն էր քննարկել Առողջության համընդհանուր ապահովագրության հիմնադրամի կողմից բժշկական կազմակերպությունների՝ նախորդ վեց ամիսների ընթացքում հատուցման ներկայացված ծառայությունների՝ հիմնադրամի ժամանակավոր խորհրդի թիվ 05-L որոշմամբ հաստատված փոխհատուցման նպատակներին համապատասխանության մշտադիտարկման արդյունքները։
Մասնակիցներին ներկայացվել է նաև հիմնադրամի կողմից մշակված նոր թվային հարթակը, որի միջոցով բժշկական կազմակերպությունները կարող են տեսնել համակարգի կողմից արձանագրված հնարավոր շեղումներն ու անհամապատասխանությունները։ Սա հնարավորություն կտա ժամանակին բացահայտել և շտկել խնդիրները՝ նպաստելով ծառայությունների մատուցման գործընթացների բարելավմանը։
Հանդիպման ընթացքում մասնակիցները հնարավորություն են ունեցել ներկայացնելու իրենց հարցերն ու դիտարկումները, քննարկելու աշխատանքի ընթացքում ծագող մարտահրավերները և ստանալու անհրաժեշտ պարզաբանումներ։