Ապրիլի 17–ին տեղի է ունեցել ՀՀ առողջապահության նախարարության և Առողջության համընդհանուր ապահովագրության հիմնադրամի ղեկավարության և Առողջապահության համաշխարհային կազմակերպության մասնակցությամբ աշխատաժողով։ Աշխատաժողովի կենտրոնում էր առողջապահության ֆինանսավորման և առողջության համընդհանուր ապահովագրության թեման։ Մասնակիցները մասնավորապես անդրադարձել են միջոցների հավաքագրման, համախմբման և ռազմավարական գնումների մեխանիզմներին։
Միջազգային փորձագետները ներկայացրել են նաև որոշումների կայացման ապացուցահեն գործիքներ և մոտեցումներ, որոնք հնարավորություն են տալիս առավել արդյունավետ բաշխել ռեսուրսները և ձևավորել երկարաժամկետ կայուն ֆինանսավորման մոդել։
Ընդգծվել է նաև առողջության առաջնային պահպանման օղակի (ԱԱՊ) դերը՝ որպես համակարգի արդյունավետության և հասանելիության կարևոր հիմք։
Նմանատիպ աշխատաժողովները և քննարկումները կարևոր դեր են խաղում գործընկերային համագործակցության և համընդհանուր ապահովագրության համակարգի կայուն զարգացման համար։