Մարտի 10-ին ՀՀ առողջապահության նախարարի առաջին տեղակալ Լենա Նանուշյանը, Առողջության համընդհանուր ապահովագրության հիմնադրամի գլխավոր տնօրենի ժամանակավոր պաշտոնակատար Սամվել Խարազյանը և Հիմնադրամի պայմանագրերի, մեթոդաբանության և որակի կառավարման բաժնի ղեկավար Տիգրան Հովհաննիսյանը աշխատանքային շրջայց կատարեցին Երևանի «Սուրբ Գրիգոր Լուսավորիչ» բժշկական կենտրոնում։
Այցի ընթացքում քննարկվեցին առողջապահական ծառայությունների կազմակերպման և մատուցման հետ կապված մի շարք կարևոր հարցեր։ Մասնավորապես անդրադարձ կատարվեց բուժանձնակազմի վարձատրության մեխանիզմներին, սքրինինգային ծրագրերի ծավալներին, հերթագրման համակարգի արդյունավետությանը և բուժհաստատության ընդհանուր ծանրաբեռնվածությանը։ Քննարկման թեմաներից էին նաև պատվաստումների իրականացումը, բժշկական այցերի և խորհրդատվությունների կազմակերպման առանձնահատկությունները, ինչպես նաև կցագրված բնակչության թվաքանակին առնչվող հարցերը։
Լենա Նանուշյանը և Հիմնադրամի ներկայացուցիչները զրուցեցին բուժանձնակազմի անդամների հետ, լսեցին նրանց դիտարկումներն ու առաջարկները՝ ուղղված բուժօգնության կազմակերպման գործընթացների բարելավմանը։ Հիմնադրամի ղեկավար կազմի կողմից ներկայացվեց նաև տեղեկատվություն բոնուսային համակարգում նախատեսվող փոփոխությունների վերաբերյալ։
Շրջայցի շրջանակում Սամվել Խարազյանը և Տիգրան Հովհաննիսյանը այցելեցին նաև Երևանի «Նոր-Նորք» առողջության կենտրոն։ Նրանք շրջեցին բուժհաստատության տարբեր բաժիններով և տեղում ծանոթացան աշխատանքային գործընթացներին։ Հանդիպման ընթացքում անդրադարձ կատարվեց բուժհաստատության տեխնիկական ապահովվածությանը, ֆինանսական բաշխումներին և առկա խնդիրներին։ Ընդգծվեց, որ անհրաժեշտ է շարունակական և աստիճանական փոփոխությունների իրականացում՝ առողջապահական համակարգի հետագա զարգացման, ինչպես նաև բուժօգնության կազմակերպման գործընթացների առավել արդյունավետ և օպտիմալ կառավարման համար։
Նման շրջայցերը կրելու են պարբերական բնույթ՝ բուժհաստատությունների աշխատանքի մշտադիտարկումն իրականացնելու և առկա խնդիրներին համատեղ լուծումներ տալու նպատակով։