Փետրվարի 19-ին Անի Պլազա հյուրանոցում տեղի ունեցավ Հայկական բժշկական ասոցիացիայի (ՀԲԱ) խորհրդի հերթական նիստը, որին մասնակցեց նաև Առողջության համընդհանուր ապահովագրության հիմնադրամի տնօրենի ժամանակավոր պաշտոնակատար Սամվել Խարազյանը։
Հայկական բժշկական ասոցիացիան միավորում է Հայաստանի Հանրապետությունում գործող նեղ մասնագիտական բժշկական ուղղություններով միությունները, դրանց ղեկավար կազմը, ինչպես նաև բժիշկների, բժշկա-կենսաբանական գիտությունների և հանրային առողջության մասնագետների։
Նիստի օրակարգի առանցքային թեման առողջության համընդհանուր ապահովագրության համակարգն էր։ Քննարկման ընթացքում Սամվել Խարազյանը պատասխանեց ներկաների կողմից բարձրացված բազմաբնույթ հարցերին։ Ներկայացվեցին ծառայությունների շրջանակի հնարավոր ընդլայնման, դեղորայքային ապահովման, համակարգի գործարկման և զարգացման ուղղությամբ նախատեսվող քայլերը։ Առանձին անդրադարձ եղավ նաև բժշկական անձնակազմի վարձատրության թեմային, ներկայացվեցին կիրառվող մոտեցումներն ու գործող սխեմաները։
Նիստի ընթացքում ձևավորվեց մասնագիտական երկխոսության կարևոր հարթակ՝ ուղղված առողջության համընդհանուր ապահովագրության համակարգի արդյունավետ ներդրմանը։ Քննարկման արդյունքում բուժհաստատությունների և մասնագիտական միությունների հետ համատեղ հստակեցվեցին հետագա համագործակցության ուղղությունները, որոնց նպատակն է ապահովել շահառուներին մատուցվող ծառայությունների արդյունավետ և կազմակերպված իրականացումը։