Սամվել Խարազյանի հարցազրույցը Արշալույս Մղդեսյանի հետ ՍիվիլՆեթի տաղավարում

ՍիվիլՆեթի տաղավարում Սամվել Խարազյանը նշել է, որ հունվար-հունիս ամիսների ծախսերի ամբողջական հաշվետվությունը հրապարակվել է հիմնադրամի պաշտոնական կայքում: Այն պարունակում է ինչպես շահառուների թվային տվյալներ, այնպես էլ բժշկական կազմակերպություններին և դեղատներին կատարված փոխհատուցումների վերաբերյալ ամբողջական պատկեր․

2029 թվական. պարտադիր սքրինինգային հետազոտություններ

Օրենքով ամրագրված է, որ 2029 թվականից ապահովագրական փաթեթի ակտիվացման պարտադիր պայման է դառնալու սքրինինգային հետազոտություններ անցնելը: Այս տարիների ընթացքում շահառուներին հորդորում ենք արդեն իսկ անցնել կանխարգելիչ հետազոտություններ։

«Սքրինինգը միայն հայտնաբերում չէ, այն ներառում է նաև խորացված ախտորոշում և բուժում, որն ամբողջությամբ փոխհատուցվում է ապահովագրական փաթեթի շրջանականերում», - հավելել է Խարազյանը:

Հետազոտությունների որակը. միասնական չափանիշներ ամբողջ Հայաստանում

Պարոն Խարազյանը վստահեցրել է, որ մարզերում և Երևանում հետազոտությունների որակը նույնն է, քանի որ կիրառվում են միևնույն թեստերն ու սարքավորումները: Բացի այդ, ապահովագրված քաղաքացին կարող է իր տարիքային խմբին համապատասխան առաջարկվող կանխարգելիչ հետազոտությունների ամբողջական ցանկը գտնել հիմնադրամի կայքում:

Նոր խմբերի միացում և 400,000 նոր շահառու

2027-2029 թթ. համակարգին միանալու են նոր խմբեր։ Սամվել Խարազյանի խոսքերով՝ նախնական հաշվարկներով՝ համակարգին հաջորդ տարի կմիանա մոտ 400,000 նոր քաղաքացի: Ընդ որում, արդեն իսկ քննարկվում են էլեկտրոնային հարթակների միջոցով վճարումների հեշտացված մեխանիզմները:

80%-ից մինչև 2%. գրպանից կատարվող ծախսերի կտրուկ նվազում

Ամենաուշագրավ վիճակագրություններից մեկը վերաբերում է քաղաքացիների սեփական միջոցներից կատարվող ծախսերին.

- Մինչև համակարգի ներդրումը (մինչև 2025թ.) դրանք կազմում էին ընդհանուր առողջապահական ծախսերի մինչև 80%:

- Ընթացիկ 6-7 ամիսներում գրպանից կատարվող վճարները (համավճարները) կազմել են ընդամենը 1.8-2%:

- Դեղորայքի համար համավճարը միջինում կազմում է 6.5-7% (նախկին 30-40%-ի փոխարեն):

«Առողջությունը չպետք է կախված լինի մարդու վճարունակությունից, և մենք գնում ենք հենց այդ ուղղությամբ», - ամփոփել է Խարազյանը:

Հաջորդ քայլերը. ակտուարական հաշվարկներ և ապահովագրավճարի վերանայման հնարավորություն

Ամեն տարի բյուջեի կատարողականի քննարկման ժամանակ լիազոր մարմինը (Առողջապահության նախարարությունը) կարող է նախաձեռնել ապահովագրավճարի չափի վերանայում՝ հաշվի առնելով գնաճը, ծառայությունների գների փոփոխությունը և համակարգի ընդլայնումը:

«Առայժմ 2027-ի համար ավելացման կանխատեսում չունենք, սակայն երկարաժամկետ հատվածում ամեն ինչ կախված կլինի ռիսկերի գնահատումից», - եզրափակել է Սամվել Խարազյանը: