Առողջության համընդհանուր ապահովագրության համակարգի ներդրումից հետո առողջապահական ոլորտում արձանագրվել են էական փոփոխություններ՝ ինչպես ծառայությունների հասանելիության, այնպես էլ համակարգի արդյունավետության տեսանկյունից։ «Ֆակտոր Թիվի»-ին տված հարցազրույցում Առողջության համընդհանուր ապահովագրության հիմնադրամի գլխավոր տնօրենի ժամանակավոր պաշտոնակատար Սամվել Խարազյանը ներկայացրել է, թե ինչպես է համակարգի գործարկումը փոխել բժշկական ծառայություններից օգտվելու վարքագիծը և առողջապահական ռեսուրսների օգտագործումը։
Ըստ Խարազյանի՝ փոխվել է բժշկական ծառայություններից օգտվելու մշակույթը։ Եթե նախկինում ընտանեկան բժշկի անվճար այցը հաճախ չէր շարունակվում հետագա հետազոտություններով լրացուցիչ ծախսերի պատճառով, ապա այժմ ապահովագրության շրջանակում փոխհատուցվում են նաև ախտորոշիչ հետազոտություններն, նեղ մասնագետների խորհրդատվությունները և դեղորայքը։ Արդյունքում աճել է վստահությունը համակարգի նկատմամբ և նվազել ինքնաբուժության միտումը։
Առաջին 100 օրվա վիճակագրությունը հստակ արտացոլում է արձանագրված փոփոխությունները․ միայն մարտ ամսվա տվյալներով շուրջ 70,000 քաղաքացի առաջին անգամ է օգտվել առողջապահական ծառայություններից, իսկ ավելի քան 100,000-ը բուժօգնություն է ստացել բացառապես ապահովագրված լինելու շնորհիվ՝ նախկինում չլինելով պետական աջակցության ծրագրերի շահառու։
Համակարգը նաև պահպանում է ընտրության հնարավորությունը քաղաքացիների համար․ ցանկության դեպքում նրանք կարող են ընտրել կոնկրետ բժշկի և կատարել լրացուցիչ վճարում, ինչի արդյունքում ձևավորվում է մրցակցային միջավայր։
Անդրադառնալով հետագա փուլերին՝ Խարազյանը նշել է, որ նախատեսվում է ընդլայնել շահառուների շրջանակը՝ միաժամանակ ապահովելով համակարգի ֆինանսական կայունությունն ու ռիսկերի արդյունավետ կառավարումը: