Սամվել Խարազյանի հարցազրույցը Banks.am-ին․ ամփոփվել են Առողջության համընդհանուր ապահովագրության համակարգի առաջին կիսամյակի արդյունքները

Banks.am-ի հետ զրույցում Առողջության համընդհանուր ապահովագրության հիմնադրամի գլխավոր տնօրենի ժամանակավոր պաշտոնակատար Սամվել Խարազյանը ներկայացրել է համակարգի ներդրման առաջին կիսամյակի արդյունքները։ Նրա փոխանցմամբ՝ ավելի քան 1.8 միլիոն շահառուներից մոտ 762 հազարն արդեն օգտվել է տրամադրվող բժշկական ծառայություններից, իսկ փոխհատուցված գումարը կազմել է շուրջ 103 միլիարդ դրամ։ Քաղաքացիներն օգտվել են փաթեթում ընդգրկված ծառայությունների գրեթե ողջ սպեկտրից՝ սկսած առաջնային խորհրդատվությունից ու դեղորայքից, վերջացրած բարդ վիրահատություններով և ուռուցքաբանական բուժմամբ։

Անդրադառնալով հիմնական ցուցանիշներին ու միտումներին՝ Սամվել Խարազյանը նշել է, որ 200 հազար դրամից բարձր աշխատավարձ ստացող 18-64 տարեկան քաղաքացիների դիմելիությունը կրկնակի գերազանցել է նախնական կանխատեսումները։ Սա ցույց է տալիս, որ ֆինանսական խոչընդոտի վերացումից հետո մարդիկ սկսել են ակտիվորեն զբաղվել իրենց առողջական խնդիրներով։

Ըստ պարոն Խարազյանի՝ առողջապահական խնդիրների ժամանակին լուծումը կանխում է հիվանդությունների բարդացումն ու հաշմանդամությունը՝ պահպանելով քաղաքացիների աշխատունակությունը և նվազեցնելով պետության հետագա ծախսերը։

Ամենամեծ պահանջարկն արձանագրվել է սիրտ-անոթային հիվանդությունների, շաքարային դիաբետի և աչքի խնդիրների ուղղությամբ։ Համակարգում մեծ տեղ է հատկացված կանխարգելիչ հետազոտություններին (սքրինինգներ) և առաջնային օղակում (ամբուլատորիաներ) դրանց արդյունավետ բուժմանը։

Սամվել Խարազյանի գնահատմամբ՝ համակարգի ֆինանսական իրավիճակը վերահսկելի է, իսկ հնարավոր շեղումներն ու ռիսկերը մեղմելու համար գործում է հատուկ պահուստային ֆոնդ (հավաքագրված վճարների 10%-ի չափով)։

Խոսելով ապագա անելիքների մասին՝ Սամվել Խարազյանն ընդգծել է, որ առաջիկա ռազմավարական նպատակն է նախապատրաստվել համակարգի հաջորդ փուլերին, որոնց շրջանակում ներառվելու են բոլոր աշխատողները (այդ թվույմ՝ քաղաքացիաիրավական պայմանագրերով), պասիվ եկամուտ ունեցողները, տաքսու վարորդները (2027թ․-ից) և ընտանիքի մյուս անդամները։ Առաջին ամիսների տվյալները հնարավորություն են տալիս ճշգրիտ գնահատել ծախսերն ու պատրաստվել համակարգի ընդլայնմանը։