2026 թվականի հուլիսի 13-ից մինչև հուլիսի 15-ը ներառյալ ՀՀ Սյունիքի և Վայոց ձորի մարզերում Առողջության համընդհանուր ապահովագրության հիմնադրամի կողմից իրականացվել են տարեկան պլանային ստուգումներ` ղեկավարվելով Առողջության համընդհանուր ապահովագրության հիմնադրամի ժամանակավոր խորհրդի՝ 2026 թվականի հունիսի 17-ի թիվ 03-L որոշմամբ։
Այցերի ընթացքում ստուգվել են հիմնադրամի հետ պայմանագիր կնքած բժշկական օգնություն և սպասարկում իրականացնող կազմակերպություններում ՀՀ կառավարության 2025 թվականի դեկտեմբերի 25-ի թիվ 1985-Ն որոշմամբ նախատեսված նվազագույն պահանջներին (այդ թվում՝ որակի) համապատասխանության հարցերը։
Ստուգումների նպատակն էր գնահատել կնքված պայմանագրերի նվազագույն պահանջներին համապատասխանությունը, ինչպես նաև տեղում քննարկել բժշկական օգնություն և սպասարկում իրականացնող կազմակերպությունների գործունեության ընթացքում առաջացող հարցերն ու մարտահրավերները և փոխհատուցման գործընթացների պատշաճ իրականացումը։
Հանդիպումների ընթացքում բժշկական օգնություն և սպասարկում իրականացնող կազմակերպությունների ներկայացուցիչները հնարավորություն են ունեցել բարձրաձայնելու իրենց հուզող հարցերը, ներկայացնելու դիտարկումներ և առաջարկություններ։
Նմանատիպ ստուգումները կրում են ոչ միայն հսկողական, այլև խորհրդատվական բնույթ՝ նպաստելով միասնական գործելակերպի ձևավորմանը և բժշկական օգնություն և սպասարկում իրականացնող կազմակերպությունների հետ արդյունավետ համագործակցության ամրապնդմանը։