ՀՀ առողջապահության նախարարի տեղակալ Աստղիկ Գրիգորյանը, Առողջության համընդհանուր ապահովագրության հիմնադրամի գլխավոր տնօրենի ժամանակավոր պաշտոնակատար Սամվել Խարազյանը և հիմնադրամի ղեկավար կազմը 2026 թվականի մարտի 16-ից 20-ը Կորեայի Հանրապետության Սեուլ քաղաքում մասնակցել են «Առողջության համընդհանուր ապահովագրության համակարգ, բժշկական ծառայությունների որակի ապահովում և թվային առողջապահություն» թեմայով վերապատրաստման դասընթացին։
Ծրագիրը նպատակ ուներ ներկայացնել առողջության համընդհանուր ապահովագրության ոլորտում միջազգային փորձը, մասնավորապես՝ Կորեայի Հանրապետության հաջողված մոդելը, ինչպես նաև գնահատել դրա կիրառելիությունը Հայաստանի առողջապահական բարեփոխումների համատեքստում։
Դասախոսությունների և քննարկումների ընթացքում մասնակիցները ծանոթացել են մի շարք կարևոր թեմաների, այդ թվում՝ Կորեայում ապահովագրական փաթեթի ձևավորման և ծառայությունների գների սահմանման մեխանիզմներին, վճարային համակարգերի կառուցվածքին, ազգային սքրինինգային ծրագրերի կազմակերպման և թվային կառավարման գործիքներին, դեղերի գնագոյացման քաղաքականությանը և գնային բանակցությունների գործընթացներին, ինչպես նաև ֆինանսական թվային մոնիթորինգի և համակարգի կայունության կառավարման գործիքներին։
Վերապատրաստման ընթացքում կազմակերպվել են նաև աշխատանքային այցեր Սեուլի մի շարք առողջապահական հաստատություններ, մասնավորապես՝ Իլսանդոնգ-գու հանրային առողջության կենտրոն և Կորեայի ազգային առողջապահական ապահովագրության ծառայության Իլսան հիվանդանոց, որտեղ մասնակիցները ծանոթացել են թվային լուծումների կիրառման գործող մեխանիզմներին և հաճախորդների սպասարկման կառավարման համակարգերին։
Ծրագրի ավարտին քննարկվել են հետագա համագործակցության հնարավորությունները և փորձի շարունակական փոխանակման հեռանկարները։