Մայիսի 18–ից 20–ը «Դաբլթրի բայ Հիլթն Երևան Սիթի Սենթր» հյուրանոցում տեղի է ունեցել «Առողջապահության ֆինանսավորում առողջապահական համընդհանուր ծածկույթի համար» թեմայով եռօրյա վերապատրաստման ծրագիրը:
Հայաստանում առողջապահության ֆինանսավորման հարցերը համակողմանի ուսումնասիրելու և քննարկելու նպատակով ծրագրին մասնակցում էին Առողջապահության նախարարության, Ֆինանսների նախարարության և Առողջության համընդհանուր ապահովագրության հիմնադրամի ներկայացուցիչները:
Ծրագրի նպատակն էր զարգացնել ոլորտի ղեկավարների և պատասխանատու մասնագետների կարողություններն առողջապահության ֆինանսավորման քաղաքականության մշակման, իրականացման և գնահատման ուղղությամբ:
Դասընթացի ընթացքում մասնակիցներին ներկայացվել են առողջապահության ֆինանսավորման ոլորտում միջազգային լավագույն փորձը, վերջին հետազոտական տվյալներն ու գործիքները, որոնք կարող են նպաստել արդյունավետ և կայուն առողջապահական ֆինանսավորման համակարգերի ձևավորմանը։ Քննարկվել են նաև առողջապահության ֆինանսավորման, պետական ծախսերի արդյունավետության, ռազմավարական գնումների, առաջնային առողջապահական պահպանման, ինչպես նաև Հայաստանում իրականացվող համապարփակ առողջապահական ապահովագրության բարեփոխումների հարցերը։
Դասընթացի ավարտին տեղի է ունեցել պանելային քննարկում՝ նվիրված առողջության համընդհանուր ապահովագրության համակարգի ներդրման առաջին ամիսների հիմնական մարտահրավերներին, արձանագրված հաջողություններին և առաջիկա նախագծերին։ Պանելային քննարկմանը մասնակցել են Առողջության համընդհանուր ապահովագրության հիմնադրամի գլխավոր տնօրենի ժամանակավոր պաշտոնակատար Սամվել Խարազյանը, Համաշխարհային բանկի Հայաստանի գրասենյակի ղեկավար Ֆաբրիցիո Ձարկոնեն և Հայաստանում Առողջապահության համաշխարհային կազմակերպության գրասենյակի ղեկավար Դոկտոր Սիդարթա Սանքար Դատտան։
Դասընթացը կազմակերպվել էր Առողջապահության համաշխարհային կազմակերպության կողմից Համաշխարհային բանկի հետ համագործակցությամբ և Կորեա–Համաշխարհային բանկ գործընկերության դրամաշնորհային ծրագրի ֆինանսավորմամբ։