Առողջության համընդհանուր ապահովագրության հիմնադրամի Պայմանագրերի, մեթոդաբանության և որակի կառավարման բաժնի ղեկավար Տիգրան Հովհաննիսյանը և հիմնադրամի ուսուցման թիմն անցկացրել են առկա ձևաչափով չորսօրյա վերապատրաստում Երևանի բոլոր բժշկական կենտրոնների ներկայացուցիչների համար։
Վերապատրաստման հիմնական թեմաներն էին առողջության համընդհանուր ապահովագրության համակարգի շրջանակում փոխհատուցման կարգը, ծառայությունների սահմանափակումները և բժշկական անձնակազմի վարձատրությանը վերաբերող հիմնական մեխանիզմները։ Մասնակիցներին ներկայացվել է, թե ինչպես է ձևավորվում բժշկական կազմակերպությունների աշխատավարձային ընդհանուր ֆոնդը, ինչպես են հաշվարկվում արտահիվանդանոցային և հիվանդանոցային բժշկական անձնակազմի վարձատրության չափերը, ինչպես նաև՝ ծառայությունների սահմանափակումների կիրառման սկզբունքները։ Քննարկվել են ընտանեկան բժիշկների վարձատրման նորմատիվները, ինչպես նաև այն հիվանդությունների շրջանակը, որոնց դեպքում թերապևտը կարող է իրականացնել խորհրդատվություն։
Հանդիպումների ընթացքում բժշկական կենտրոնների ներկայացուցիչները հնարավորություն են ունեցել բարձրաձայնելու իրենց հուզող հարցերը։ Առավել հաճախ քննարկված թեմաներից էին ուղեգրման կարգը, համավճարների վերաբերյալ կարգավորումները, ինչպես նաև լաբորատոր և գործիքային հետազոտությունների իրականացման ընթացակարգերը։
Թրեյնինգն անցկացվել է ակտիվ հարցուպատասխանի ձևաչափով՝ ապահովելով երկկողմանի մասնագիտական քննարկում և փորձի փոխանակում։
Առաջիկայում նախատեսվում է նմանատիպ հանդիպումներ և ուսուցողական այցեր իրականացնել նաև մարզերում։