Հիմնադրամը տարեկան պլանային ստուգումներ և վերապատրաստումներ է իրականացրել ՀՀ մարզերում
Առողջության համընդհանուր ապահովագրության հիմնադրամի Պայմանագրերի, մեթոդաբանության և որակի կառավարման բաժնի ղեկավար Տիգրան Հովհաննիսյանի գլխավորած հանձնաժողովն օգոստոսի 10-ից սեպտեմբերի 16-ը ներառյալ իրականացրել է տարեկան պլանային ստուգումներ և վերապատրաստումներ Շիրակի, Լոռու, Տավուշի, Արմավիրի և Գեղարքունիքի մարզերում։
Ստուգայցերի նպատակն էր գնահատել հիմնադրամի հետ պայմանագիր կնքած բժշկական օգնություն և սպասարկում իրականացնող կազմակերպությունների համապատասխանությունը պայմանագրով սահմանված նվազագույն պահանջներին, փոխհատուցման գործընթացների պատշաճ իրականացումը, ինչպես նաև տեղում քննարկել բժշկական կազմակերպությունների գործունեության ընթացքում ծագող մարտահրավերները։
Ստուգայցերի ընթացքում հիմնադրամի ներկայացուցիչները ծանոթացել են բուժհաստատություններում և դեղատներում ապահովագրական համակարգի շրջանակում ծառայությունների կազմակերպմանը, քննարկել առկա գործնական հարցերը և անհրաժեշտ պարզաբանումներ տրամադրել կիրառվող ընթացակարգերի վերաբերյալ։
Ստուգայցերին զուգահեռ կազմակերպվել են նաև վերապատրաստումներ պայմանագրային բժշկական կազմակերպությունների ներկայացուցիչների համար։ Վերապատրաստումների հիմնական թեմաներն էին առողջության համընդհանուր ապահովագրության համակարգի շրջանակում փոխհատուցման կարգը և սահմանափակումները՝ նպատակ ունենալով նպաստել սահմանված ընթացակարգերի միասնական և պատշաճ կիրառմանը։
Նման հանդիպումները հնարավորություն են տալիս ոչ միայն գնահատել սահմանված պահանջների պահպանումը, այլև բացահայտել խնդիրները, արձանագրել բարելավման հնարավորությունները և նպաստել դրանց ժամանակին լուծմանը։
Հիմնադրամը շարունակելու է պարբերական ստուգայցերը, վերապատրաստումներն ու աշխատանքային քննարկումները պայմանագրային բժշկական կազմակերպությունների հետ՝ ապահովագրական համակարգի շրջանակում գործընթացների հետևողական բարելավման և շահառուներին մատուցվող ծառայությունների պատշաճ կազմակերպման նպատակով։