Կարևորելով կանխարգելիչ հետազոտությունների նշանակությունը հանրային առողջության պահպանման գործում՝ ԱՀԱ փաթեթում ներառվել է արգանդի պարանոցի քաղցկեղի սքրինինգային ծրագիրը և այժմ հասանելի է ԱՀԱ շահառուներին։ Առողջության համընդհանուր ապահովագրության հիմնադրամի գլխավոր տնօրենի ժամանակավոր պաշտոնակատար Սամվել Խարազյանը սքրինինգային ծրագրի մանրամասները ներկայացրել է «Առավոտը Շանթում» հեռուստահաղորդման եթերում։
Անդրադառնալով բնակչության առողջապահական ներկայիս վարքագծին՝ Խարազյանը նշել է, որ հասարակության մեջ դեռևս տարածված է այն պատկերացումը, թե հետազոտության կարիք կա միայն առողջական գանգատների դեպքում, մինչդեռ բազմաթիվ հիվանդություններ երկար ժամանակ կարող են զարգանալ առանց որևէ ախտանշանի։ Վաղ փուլում հայտնաբերված հիվանդությունների դեպքում հնարավոր է ժամանակին սկսել հսկողությունը կամ բուժումը և կանխել դրանց հետագա զարգացումը։
Արգանդի պարանոցի քաղցկեղը կանանց շրջանում ամենահաճախ հանդիպող քաղցկեղային հիվանդություններից մեկն է աշխարհում։ Քաղցեղի դեպքերի ավելի քան 95%-ի պատճառը մարդու պապիլոմավիրուսի (ՄՊՎ) քաղցկեղածին շտամերն են։ ՄՊՎ-ն շատ տարածված վիրուս է, որը փոխանցվում է սեռական ճանապարհով, և գրեթե բոլոր մարդիկ իրենց կյանքի որոշակի ժամանակահատվածում վարակվում են այս վիրուսով, սակայն օրգանիզմը հաճախ ինքնուրույն մաքրում է այն։ Այնուամենայնիվ, որոշ բարձր ռիսկային շտամեր կարող են պահպանվել օրգանիզմում և պահանջել դինամիկ հսկողություն՝ բարդությունների կանխարգելման նպատակով։
Խարազյանը փաստել է, որ կանոնավոր սքրինինգային հետազոտությունները նպաստում են հիվանդության վաղ հայտնաբերմանն ու բուժման արդյունավետության բարձրացմանը։ Որպեսզի ավելի մեծ թվով կանայք կարողանան ժամանակին հայտնաբերել առկա խնդիրները, ԱՀԱ փաթեթի շրջանակում 30–60 տարեկան կանանց համար այժմ հասանելի է ՄՊՎ հայտնաբերման ՊՇՌ մեթոդով հետազոտությունը, որն իրականացվում է 5 տարի պարբերականությամբ։ Նմուշառումը հնարավոր է իրականացնել երկու եղանակով՝ բուժաշխատողի կողմից կամ ինքնանմուշառմամբ։ Սքրինինգային ծրագրի շրջանակներում մարդու պապիլոմավիրուսի թեստավորման հավաքածուները և թեստերը հասանելի են առողջության առաջնային պահպանման օղակներում, և ծրագրից օգտվելու համար ընտանեկան բժշկի ուղեգիր չի պահանջվում։
Խարազյանը նաև նշել է, որ լրահետազոտության և բուժման ողջ ծավալը ևս ներառված է ապահովագրական փաթեթում։ Թեստի դրական արդյունքի դեպքում կինն ուղեգրվում է լրահետազոտության՝ կոլպոսկոպիայի։ Կոլպոսկոպիկ հետազոտությունն իրականացվում է սքրինինգային ծրագրի շրջանակներում միջազգային վերապատրաստում անցած և սերտիֆիկացված մասնագետների կողմից։
Խարազյանը կարևորել է սքրինինգային հետազոտություններին մասնակցությունը՝ ընդգծելով, որ բնակչության ակտիվ ներգրավվածությունը կանխարգելիչ ծրագրերին կնպաստի հանրային առողջության բարելավմանը։