Առողջության համընդհանուր ապահովագրության հիմնադրամի Հատուցումների կառավարման և ռիսկերի մեթոդաբանության բաժնի ղեկավար Նաիրա Ավետիսյանը «Կենտրոն» հեռուստաընկերության եթերում մասնակցել է «Կարևոր է իմանալ» հաղորդմանը՝ ներկայացնելով առողջության համընդհանուր ապահովագրության համակարգի գործարկման ընթացքը, հիմնական նպատակներն ու առաջիկա փուլերում նախատեսվող ծրագրերը։
Ավետիսյանի խոսքով՝ առողջության համընդհանուր ապահովագրության համակարգը միտված է առողջապահության ոլորտում խորքային և համակարգային փոփոխությունների իրականացմանը։ Համակարգի կարևոր նպատակներից են բուժօգնության հասանելիության բարձրացումը, ծառայությունների որակի բարելավումը և քաղաքացիների ֆինանսական բեռի էական նվազեցումը, ինչի արդյունքում հնարավոր կլինի ձևավորել սոցիալական համերաշխության վրա հիմնված կայուն, արդար և արդյունավետ առողջապահական համակարգ։ Ներկայացնելով համակարգի ներդրման ընթացքը՝ Ավետիսյանը նշել է, որ այն իրականացվում է փուլային տարբերակով։ Այս պահին համակարգում ընդգրկված է շուրջ 1.7 մլն շահառու, այդ թվում՝ առավել խոցելի խմբերի ներկայացուցիչներ։ Հետագայում նախատեսվում է շահառուների շրջանակի շարունակական ընդլայնում։
Ավետիսյանը խոսել է նաև համակարգի առաջին արդյունքների մասին՝ արձանագրելով, որ հիմնադրամի գործունեության առաջին երեք ամիսների ընթացքում գրանցվել է ամբուլատոր օղակում դիմելիության և հաճախելիության էական աճ, ինչը վկայում է համակարգի նկատմամբ քաղաքացիների վստահության բարձրացման մասին։
Անդրադառնալով բուժհաստատությունների հետ համագործակցության ձևաչափին՝ Ավետիսյանը նշել է, որ այն իրականացվում է պայմանագրային հիմունքներով, իսկ համագործակցող կազմակերպություններին ներկայացվում են հստակ պահանջներ՝ ծառայությունների որակի, մասնագիտական կարողությունների և տեխնիկական հագեցվածության վերաբերյալ։ Առողջության առաջնային պահպանման օղակը, որպես այս համակարգում բուժօգնության ստացման մեկնարկային կետ, Ավետիսյանը ներկայացրել է որպես առանցքային բաղադրիչ՝ նշելով, որ իրականացվում են վերապատրաստումներ, որոնք շարունակական բնույթ են կրելու՝ նպատակ ունենալով ապահովել առաջնային օղակի պատրաստվածությունը նոր համակարգի պահանջներին։
Արդրադարձ է կատարվել նաև բուժման ամբողջ ընթացքում շարունակական մշտադիտարկման իրականացման նշանակությանը։ Ավետիսյանի խոսքով՝ մշտապես վերլուծության են ենթարկվում բուժառուների առողջությանը վերաբերող բազմաթիվ ցուցանիշներ, այդ թվում՝ բարդությունների առաջացումը և կրկնակի հոսպիտալացումները, ինչը հնարավորություն է տալիս ապահովել որակի վերահսկման արդյունավետ մեխանիզմներ։
Հաղորդման ավարտին Ավետիսյանը խոսել է համակարգում քաղաքացիների ակտիվ դերակատարության մասին՝ ընդգծելով, որ բուժառուների արձագանքը և դիմումները կարևոր աղբյուր են առկա խնդիրների բացահայտման և դրանց շտկման համար։ Ըստ Ավետիսյանի՝ համակարգը գտնվում է շարունակական զարգացման փուլում, և համատեղ աշխատանքի շնորհիվ՝ պետական կառույցների, բուժհաստատությունների և քաղաքացիների ակտիվ մասնակցությամբ, հնարավոր կլինի հասնել առողջության համընդհանուր ապահովագրության համակարգի հիմնական նպատակների լիարժեք իրագործմանը։