2 տարի հետո մեր բնակչության 95%-ը կլինի ապահովագրված․ Տիգրան Հովհաննիսյան
«Դիալոգ» փոդքասթի հերթական թողարկմանը հյուրընկալվել էր Առողջության համընդհանուր ապահովագրության հիմնադրամի պայմանագրերի, մեթոդաբանության, որակի կառավարման և ուսուցման բաժնի ղեկավար Տիգրան Հովհաննիսյանը։ Զրույցի ընթացքում անդրադառնալով համակարգի ներդրման ընթացքին՝ նա ընդգծել է, որ բարեփոխման հիմնական նպատակը բնակչության համար որակյալ ու հասանելի բուժօգնության ապահովումն է և առողջապահական ծախսերի էական կրճատումը։ Նրա խոսքով՝ համակարգը ներդրվում է փուլային տարբերակով, և նախատեսվում է, որ երկու տարի անց բնակչության շուրջ 95%-ը կունենա ապահովագրություն։
Անդրադառնալով քաղաքացիների դժգոհություններին՝ Տիգրան Հովհաննիսյանը նշել է, որ բուժառուների շրջանում ամենահաճախ հանդիպող խնդիրը պլանային այցերի հերթերն են, իսկ բժիշկների մոտ՝ ծանրաբեռնվածության ավելացումը։ Նա պարզաբանել է, որ հերթերը մեղմելու համար ներդրվում է էլեկտրոնային և հեռախոսակապով հերթագրման համակարգը, իսկ բժիշկների ծանրաբեռնվածությունը փոխհատուցվում է ըստ կատարված աշխատանքի։
Խոսելով համավճարների մասին՝ Տիգրան Հովհաննիսյանը հերքել է դրանց քաղաքականացման կամ ընտրությունների հետ կապ ունենալու վարկածները՝ շեշտելով, որ համավճարի կիրառման կարգը սահմանված է եղել օրենքի ներդրման առաջին իսկ օրվանից։ Ըստ նրա՝ համավճարի չափը ֆիքսված է և թափանցիկ, իսկ համավճար կիրառող մասնագետին զուգահեռ բուժհաստատությունը պարտավոր է ապահովել նաև առանց համավճարի աշխատող բժիշկ։
Տիգրան Հովհաննիսյանն արձանագրել է, որ թեև համակարգին միանալը կամավոր է, և որոշ առաջատար բժիշկներ սկզբում սպասողական դիրք էին ընդունել, այսօր միացողների և ծառայություններն ընդլայնողների թիվն ավելանում է։ Նա հավաստիացրել է, որ բուժօգնության որակի անկումը կանխելու համար գործում է հատուկ ստորաբաժանում, որը վերահսկում է սահմանված ժամանակային ու որակական կրիտերիաները։
Ամփոփելով՝ պարոն Հովհաննիսյանը հայտնել է, որ հաջորդ փուլով հանվելու է աշխատավարձի շեմը, համակարգին են միանալու գյուղատնտեսությամբ զբաղվողները, տաքսու վարորդները և այլ խմբեր։