Առողջության համընդհանուր ապահովագրության հիմնադրամի Ֆինանսական և ապահովագրական հատուցումների գծով տնօրեն Հայկ Բաբայանը «Գործարար ալիք»-ի «Թարմ ուղեղով» հաղորդման ընթացքում անդրադարձել է առողջության համընդհանուր ապահովագրության համակարգի առաջին ամիսների արդյունքներին և ֆինանսական կառավարման մեխանիզմներին։
Խոսելով համակարգի շահառուների մասին՝ Հայկ Բաբայանը նշել է, որ ներկայում ԱՀԱ համակարգում ընդգրկված է շուրջ 1.7 միլիոն ապահովագրված անձ։ Նրա խոսքով՝ ապահովագրված անձանց թիվն ամեն ամիս շարունակում է աճել մի քանի հազարով, և կանխատեսվում է, որ մինչև տարեվերջ այն կարող է հասնել շուրջ 1.8 միլիոնի։ Բաբայանն ընդգծել է, որ այս աճին մեծապես նպաստում է աշխատատեղերի ավելացումը, քանի որ նոր աշխատողների ներգրավմամբ ավելանում է նաև համակարգում ընդգրկված և ապահովագրավճար վճարող քաղաքացիների թիվը։ Կարևոր դեր են կատարում նաև ապահովագրավճարն ինքնուրույն վճարող շահառուները։ Ինչ վերաբերում է ծառայություններից օգտվելու ակտիվությանը, համակարգի գործարկման առաջին չորս ամիսների ընթացքում ապահովագրված բնակչության շուրջ հիսուն տոկոսն արդեն օգտվել է առողջապահական ծառայություններից։
Անդրադառնալով առողջապահական կազմակերպությունների ներգրավվածությանը՝ Բաբայանը նշել է, որ հիմնադրամի համար կարևոր նշանակություն ունի ոչ միայն խոշոր հիվանդանոցների, այլ նաև փոքր բուժհաստատությունների, մարզային ամբուլատորիաների, լաբորատորիաների և դեղատների ընդգրկվածությունը համակարգում։ Նրա խոսքով՝ հատկապես մարզերում կարևոր է ապահովել լայն հասանելիություն, որպեսզի բնակավայրերի մեծ մասում քաղաքացիները հնարավորություն ունենան օգտվել համագործակցող դեղատների ծառայություններից և ստանալ անհրաժեշտ դեղորայքը։ Ըստ Բաբայանի՝ այսօր արդեն բազմաթիվ փոքր դեղատներ համագործակցում են հիմնադրամի հետ, և նույնիսկ փոքր ծավալների փոխհատուցումները կարևոր աջակցություն են հատկապես քրոնիկական հիվանդություններ ունեցող քաղաքացիների համար։
Հաղորդման ընթացքում անդրադարձ է կատարվել նաև հերթերի կառավարման և ծառայությունների որակի բարելավման ուղղությամբ տարվող աշխատանքներին։ Բաբայանը նշել է, որ հիմնադրամն ունի ուսուցման թիմ, որն աշխատում է բուժհաստատությունների և բժիշկների հետ քաղաքացիների ճիշտ ուղղորդման, հերթերի կառավարման և առողջապահական ծառայությունների կազմակերպման արդյունավետության բարձրացման ուղղությամբ։ Հիմնադրամում գործող որակի վերահսկման թիմը նույնպես հետևողական աշխատանք է իրականացնում, որպեսզի բուժհաստատություններում ներդրվեն միջազգային չափանիշներին համապատասխան որակի կառավարման մեխանիզմներ, և շարունակաբար բարելավվի մատուցվող ծառայությունների որակը։
Խոսելով մասնավոր ապահովագրական ընկերությունների հետ համագործակցության մասին՝ Բաբայանը նշել է, որ մասնավոր ապահովագրական համակարգը շարունակում է պահպանել իր պորտֆելի զգալի մասը։ Միևնույն ժամանակ, քննարկվում են համագործակցության նոր ուղղություններ, որոնց շրջանակում մասնավոր ապահովագական ընկերությունները կարող են առավել ակտիվ ներգրավվել այնպիսի ծառայությունների ոլորտներում, ինչպիսիք են ստոմատոլոգիական ծառայությունները կամ ավելի բարձրարժեք վիրահատությունների լրացուցիչ ծածկույթը։
Ֆինանսական կառավարման վերաբերյալ Բաբայանը նշել է, որ հիմնադրամի ֆինանսական հոսքերը մի քանի անգամ գերազանցում են մասնավորների բոլոր ապահովագրական հատուցումները՝ այդ թվում գույք, ԱՊՊԱ։ Նա ընդգծել է, որ հիմնադրամի գործունեությունը գտնվում է պետական վերահսկողության ներքո, իսկ տարվա երկրորդ կեսից նախատեսվում է համագործակցություն նաև խոշոր աուդիտորական կազմակերպության հետ՝ ֆինանսական ցուցանիշների լրացուցիչ գնահատման նպատակով։ Բաբայանի խոսքով՝ տարվա ավարտին կհրապարակվեն նաև ֆինանսական հաշվետվություններ՝ ապահովելով համակարգի գործունեության թափանցիկությունը։