Մեկնարկել է ԵՄ ֆինանսավորմամբ «Թվինինգ» ծրագիրը՝ ի աջակցություն առողջության համընդհանուր ապահովագրության բարեփոխման
Սեպտեմբերի 30-ին Հայաստանի ազգային պատկերասրահում տեղի է ունեցել Եվրոպական միության ֆինանսավորմամբ իրականացվող «Աջակցություն Հայաստանում առողջության համընդհանուր ապահովագրության բարեփոխման իրականացմանը» «Թվինինգ» ծրագրի պաշտոնական մեկնարկային միջոցառումը։ Երկամյա ծրագիրն իրականացվելու է Հայաստանի, Խորվաթիայի Հանրապետության և Սլովենիայի Հանրապետության գործընկերությամբ՝ համատեղելով երեք երկրների փորձն ու մասնագիտական ներուժը առողջության համընդհանուր ապահովագրության համակարգի զարգացման համար։
«Թվինինգ» ծրագիրը նպատակ ունի հզորացնելու առողջության համընդհանուր ապահովագրության համակարգի ինստիտուցիոնալ կարողությունները, կատարելագործելու առողջապահության ֆինանսավորման մեխանիզմները և նպաստելու համակարգի կայուն զարգացմանը։ Համագործակցության շրջանակում աշխատանքները կկենտրոնանան իրավական և ինստիտուցիոնալ կարգավորումների ամրապնդման, գործառնական գործընթացների կատարելագործման, ֆինանսական կայունության ապահովման և առողջապահական համակարգի կառավարման բարելավման վրա։
Միջոցառմանը ելույթով հանդես է եկել ՀՀ առողջապահության նախարար Անահիտ Ավանեսյանը՝ խոսելով առողջության համընդհանուր ապահովագրության բարեփոխման նշանակության, դրա իրականացման ներկա փուլի և միջազգային գործընկերության կարևորության մասին։ Նախարարն ընդգծել է եվրոպական փորձի և մասնագիտական կարողությունների ներգրավման դերը Հայաստանում արդյունավետ և հասանելի առողջապահական համակարգի զարգացման գործում։
Ողջույնի խոսքով հանդես են եկել նաև Խորվաթիայի Հանրապետության առողջապահության նախարար Իրենա Հրստիչը, Հայաստանի Հանրապետությունում Սլովենիայի Հանրապետության արտակարգ և լիազոր դեսպան Մատեյա Պրևոլշեկը և Հայաստանում Եվրոպական միության պատվիրակության ղեկավար, դեսպան Վասիլիս Մարագոսը։ Նրանք կարևորել են Հայաստանի հետ համագործակցությունը և առողջապահության ոլորտում փորձի ու լավագույն գործելակերպերի փոխանակումը՝ անդրադառնալով նաև գործընկերային ծրագրերի դերին՝ երկրների միջև երկարաժամկետ կապերի ամրապնդման և առողջապահական համակարգերի առջև ծառացած ընդհանուր մարտահրավերներին համատեղ լուծումներ գտնելու գործում։