Առողջության համընդհանուր ապահովագրության համակարգի գործունեության ընթացքի, ապահովագրական ծածկույթի ընդլայնման և համակարգի ֆինանսական կայունության մասին Հանրային հեռուստաընկերությանը տված հարցազրույցում խոսել է Առողջության համընդհանուր ապահովագրության հիմնադրամի գլխավոր տնօրենի ժամանակավոր պաշտոնակատար Հայկ Բաբայանը։
Անդրադառնալով աշխատանքային հարաբերությունների դադարեցումից հետո քաղաքացիների կողմից ապահովագրավճարների շարունակական վճարմանը՝ Բաբայանը նշել է, որ դրա հիմքում առաջին հերթին բժշկական ծառայությունների շարունակականությունն է։ Քաղաքացին կարող է նախապես հերթագրված լինել հետազոտության, բուժման կամ վիրահատության համար, և աշխատանքային հարաբերությունների դադարեցումը չպետք է խաթարի արդեն պլանավորված բուժօգնության ընթացքը։ Ապահովագրական ծածկույթի շարունակականությունը հնարավորություն է տալիս անձին պահպանել փաթեթից օգտվելու իրավունքը և առողջության հետ կապված որոշումները չպայմանավորել տվյալ պահին իր աշխատանքային կարգավիճակով։
Ներկայումս աշխատանքը կորցրած և ապահովագրավճարն ինքնուրույն վճարող քաղաքացիների համար ամսական վճարը կազմում է 10,800 դրամ։ Վճարումը կատարվում է հիմնադրամի համապատասխան հաշվեհամարին, որի տվյալները հասանելի են հիմնադրամի պաշտոնական կայքում։ Բաբայանի խոսքով՝ բազմաթիվ քաղաքացիներ հետևողականորեն կատարում են իրենց վճարումները՝ պահպանելով ապահովագրական ծածկույթը։ Միաժամանակ, եթե քաղաքացին սոցիալապես անապահով է և չունի վճարումը կատարելու հնարավորություն, անհրաժեշտ է դիմել սոցիալական պաշտպանության մարմիններին՝ իր կարգավիճակը գնահատելու և համապատասխան սոցիալական խմբում ընդգրկվելու համար։
Ըստ Բաբայանի՝ համակարգի ընդլայնման հաջորդ փուլերի շրջանակում քննարկվում են ապահովագրության հասանելիությունն ավելացնող նոր մեխանիզմներ։
Բաբայանի խոսքով՝ տարվա առաջին կիսամյակը համակարգի համար առավել ծանրաբեռնված ժամանակահատվածն էր։ Համակարգի գործարկման սկզբնական փուլում հատկապես շատ էին տարիներ շարունակ կուտակված և երկարաժամկետ բուժում պահանջող դեպքերը։ Դրա օրինակներից է կատարակտի վիրահատությունը։ Եթե երկարաժամկետ կտրվածքով, ըստ միջազգային գնահատականի, տարեկան սպասվում է շուրջ 15–20 հազար կատարակտի վիրահատության անհրաժեշտություն, ապա համակարգի գործարկման առաջին ամիսներին արդեն իսկ մատուցվել է տարեկան սպասվող ծավալը շուրջ երեք անգամ գերազանցող ծառայություն։ Սա հիմնականում պայմանավորված է նախորդ տարիներից կուտակված դեպքերի սպասարկմամբ։ Այս միտումները, ըստ Բաբայանի, ցույց են տալիս, որ սկզբնական բարձր պահանջարկից հետո համակարգն աստիճանաբար շարժվում է դեպի կայունացման փուլ։
Բաբայանը նշել է, որ համակարգի ֆինանսական կայունության համար կարևոր նշանակություն ունի պահուստային միջոցների ձևավորումը։ Օրենսդրությամբ նախատեսված է հավաքագրված միջոցների մինչև 10 տոկոսի չափով պահուստ ձևավորելու հնարավորություն։ Այն ծառայելու է որպես ֆինանսական պաշտպանական բուֆեր՝ բարձր ռիսկային և արտակարգ իրավիճակներում, այդ թվում՝ համաճարակների կամ այլ նման դեպքերում համակարգի կայունությունն ապահովելու համար։