Սամվել Խարազյանը «Ռադար Արմենիա» լրատվականին տված հարցազրույցում ներկայացրել է առողջության համընդհանուր ապահովագրության համակարգի ներդրման ընթացքը և դրա հիմնական առանձնահատկությունները։
Խարազյանի խոսքով՝ համակարգի գործարկման առաջին փուլում արձանագրվել է դիմելիության զգալի աճ, ինչի արդյունքում ապահովվել է բուժօգնության մեծ ծավալ։ Թեև որոշ դեպքերում բարձր ծանրաբեռնվածությունը հանգեցրել է հերթերի և սպասման ժամանակի ավելացման, համակարգը կարողացել է հաղթահարել դիմելիության առաջին ալիքը։ Եթե նախկինում, մասնավորապես ԱԱՊ օղակում, բժիշկների այցելությունների միջին ցուցանիշը շուրջ 3–3.3 էր, ինչը զգալիորեն ցածր էր եվրոպական միջին մակարդակից, ապա այսօր հաճախելիության աճի արդյունքում համակարգը աստիճանաբար մոտենում է այդ օպտիմալ ցուցանիշներին։ Սա, ըստ Խարազյանի, վկայում է այն մասին, որ առկա կարողություններն ավելի արդյունավետ են օգտագործվում։
Անդրադառնալով բուժօգնության որակին՝ Խարազյանը նշել է, որ հիմնադրամը իրականացնում է մշտադիտարկում՝ հետևելով թե՛ արձանագրվող հետվիրահատական բարդություններին, թե՛ բուժօգնության գործընթացում ներգրավված բուժհաստատությունների և դեղատների ընդհանուր գործունեությանը։ Բացի այդ, մշակվել են գործիքներ պայմանագրերի շրջանակում գնահատումներ իրականացնելու, ռիսկային հաստատությունները բացահայտելու և տեղում խորհրդատվություն տրամադրելու նպատակով՝ միտված ծառայությունների և սպասարկման որակի բարձրացմանը։
Խարազյանն ընդգծել է, որ ԱՀԱ համակարգը ոչ միայն ֆինանսավորման նոր մեխանիզմ է, այլև առողջապահության արդյունավետության բարձրացման գործիք։ Համակարգում ներդրված են ծառայությունների արժեքի հաշվարկման նոր մոտեցումներ, թվային և էլեկտրոնային լուծումներ, ինչպես նաև բուժհաստատության ազատ ընտրության հնարավորություն, ինչը նպաստում է մրցակցության ձևավորմանը և բուժօգնության որակի բարելավմանը։ Ըստ Խարազյանի՝ հիմնադրամը շուտով անցում կկատարի նաև որակի վրա հիմնված ֆինանսավորման՝ նախատեսելով բժշկական կազմակերպությունների գնահատում և բոնուսային լրացուցիչ ֆինանսավորում բարձրորակ ծառայությունների տրամադրման դիմաց։
Խարազյանը նշել է, որ ահովագրական փաթեթը ներառում է երեք հիմնական ուղղություն՝ կանխարգելիչ և սքրինինգային ծառայություններ, բարձրարժեք բժշկական միջամտությունների հասանելիություն, ինչպես նաև առավել տարածված հիվանդությունների բուժում և շարունակական հսկողություն։ Փաթեթի շրջանակում ամբողջությամբ կամ զգալի չափով փոխհատուցվում են մի շարք բարդ և թանկարժեք ծառայություններ՝ ներառյալ սրտի ստենտավորում, գլխուղեղի էնդովասկուլյար վիրահատություններ, կոնքազդրային հոդի պրոթեզավորում և այլ միջամտություններ։ Նպատակն է նվազեցնել քաղաքացիների գրպանից կատարվող ծախսերը և ապահովել կենսական ծառայությունների հասանելիությունը։
Խարազյանի դիտարկմամբ՝ համակարգի ֆինանսական կայունությանն ապահովվում է ֆինանսավորման բազմազան աղբյուրների՝ պետական միջոցների և ապահովագրավճարների համադրությամբ, ինչպես նաև պահուստային ֆոնդի ձևավորմամբ։ Հետագա տարիներին համակարգը կընդլայնվի՝ ընդգրկելով շահառուների նոր խմբեր, ինչը կնպաստի նաև ֆինանսական կայունության ամրապնդմանը։
Խարազյանի գնահատմամբ՝ համակարգի ներդրման առաջին արդյունքները ցույց են տալիս, որ այն աստիճանաբար մոտենում է իր հիմնական նպատակին՝ բարձրացնել բուժօգնության հասանելիությունն ու որակը և նպաստել բնակչության առողջության բարելավմանը։