Ապրիլի 10-ին Ազգային ժողովում տեղի են ունեցել Առողջապահության մշտական հանձնաժողովի կողմից կազմակերպված լսումներ՝ նվիրված Առողջության համընդհանուր ապահովագրության հիմնադրամի գործունեության առաջին 100 օրերին, որին մասնակցել են Առողջապահության նախարար Անահիտ Ավանեսյանը և Առողջության համընդհանուր հիմնադրամի գլխավոր տնօրենի ժամանակավոր պաշտոնակատար Սամվել Խարազյանը:
Առողջապահության նախարարը ներկայացրել է արձանագրված հիմնական ցուցանիշները՝ մանրամասն վիճակագրական տվյալներ առողջապահական համակարգում ներգրավվածության, ծառայությունների բաշխման և փոխհատուցումների կառուցվածքի վերաբերյալ։
Ներկայացված տվյալների համաձայն՝ առողջության համընդհանուր ապահովագրության փաթեթը ներկայումս ներառում է շուրջ 2,400 ծառայություն, իսկ առաջին երեք ամիսների ընթացքում իրականացված փոխհատուցումների ընդհանուր ծավալը գերազանցել է 39,5 մլրդ դրամը։ Այս պահին համակարգում ընդգրկված է ավելի քան 1,7 մլն շահառու, որոնց շուրջ 36 տոկոսն արդեն օգտվել է բժշկական ծառայություններից։ Հիմնադրամի գործունեության առաջին հարյուր օրվա ընթացքում իրականացվել է ավելի քան 1,3 մլն հետազոտություն և շուրջ 68 հազար վիրահատություն։ Առանձին անդրադարձ է կատարվել նաև դեղորայքի բաղադրիչին․ հունվարից մարտ ընկած ժամանակահատվածում դեղորայքի փոխհատուցման ծավալը զգալիորեն աճել է՝ 681 մլն դրամից հասնելով ավելի քան 2,7 մլրդ դրամի։ Փաթեթի շրջանակներում տրամադրվել է ավելի քան 1,4 մլն դեղատոմս և գրանցվել է 458 հազարից ավելի դեղորայքի տրամադրման դեպք։
Խարազյանն ընդգծել է, որ առողջության համընդհանուր ապահովագրության համակարգը նպաստում է բժշկական ծառայությունների դիմելիության աճին․ նախկինում պետական առողջապահական ծառայություններից չօգտված ԱՀԱ շահառուների թիվն աճել է ավելի քան 4 անգամ։
Խարազյանը նշել է, որ համակարգի արդյունավետ գործարկման համար կարևոր նշանակություն ունի բժշկական կազմակերպությունների հետ համագործակցությունը։ Այս համատեքստում առաջին երեք ամիսների ընթացքում իրականացվել են բազմաթիվ առցանց հանդիպումներ և քննարկումներ, ինչպես նաև կազմակերպվել են այցելություններ բժշկական կենտրոններ՝ համակարգի ներդրման ընթացքը տեղում գնահատելու, առաջացած խնդիրները վերհանելու և դրանց արդյունավետ կարգավորման մեխանիզմներ մշակելու նպատակով։
Խարազյանը խոսել է նաև հետագայում թվային գործիքների ներդրման, այդ թվում՝ արհեստական բանականության վրա հիմնված լուծումների կիրառման ուղղությամբ կատարվող աշխատանքների մասին։