ԱՐԳԱՆԴԻ ՊԱՐԱՆՈՑԻ ՔԱՂՑԿԵՂԻ ՍՔՐԻՆԻՆԳԱՅԻՆ ՀԵՏԱԶՈՏՈՒԹՅՈՒՆ

Արգանդի պարանոցի քաղցկեղը կանանց շրջանում ամենահաճախ հանդիպող չարորակ նորագոյացություններից է, և դրա առաջացման հիմնական պատճառը 90%-ից ավելի դեպքերում մարդու պապիլոմավիրուսի (ՄՊՎ) քաղցկեղածին շտամներն են։

Մարդու պապիլոմավիրուսի (ՄՊՎ) առկայությունը չի նշանակում, որ կինն ունի քաղցկեղ։ ՄՊՎ-ն շատ տարածված վիրուս է, որը փոխանցվում է սեռական ճանապարհով։ Գրեթե բոլոր մարդիկ իրենց կյանքի որոշակի ժամանակահատվածում վարակվում են այս վիրուսով, սակայն օրգանիզմը հաճախ ինքնուրույն մաքրում է այն։ Այնուամենայնիվ, որոշ բարձր ռիսկային շտամեր կարող են պահպանվել օրգանիզմում և պահանջել դինամիկ հսկողություն՝ բարդությունների կանխարգելման նպատակով։

Արգանդի պարանոցի քաղցկեղը Հայաստանում կանանց շրջանում չարորակ նորագոյացությունների շարքում զբաղեցնում է հինգերորդ տեղը, իսկ մահացության ցուցանիշով՝ երկրորդը։ Ամեն տարի գրանցվում է միջինում շուրջ 250 նոր դեպք, որոնց գրեթե կեսն ունենում է մահվան ելք։ Դրա հիմնական պատճառը հիվանդության ուշ հայտնաբերումն է, քանի որ այն հաճախ երկար ժամանակ ընթանում է առանց արտահայտված ախտանիշների։

Հետազոտությունը նախատեսված է 30-ից 60 տարեկան կանանց համար։ Բացառություն են կազմում կանայք, ովքեր երբևէ չեն ապրել սեռական կյանքով, կանայք, ում մոտ վիրահատությունից հետո բացակայում է արգանդի պարանոցը, կանայք՝ ախտորոշված արգանդի պարանոցի քաղցկեղով կամ նախաքաղցկեղով։

Ապահովագրական փաթեթում ներառված է մարդու պապիլոմավիրուսի (ՄՊՎ) հայտնաբերման հետազոտությունը ՊՇՌ մեթոդով, որն իրականացվում է ԱՀԿ-ի կողմից հաստատված, FDA սերտիֆիկացված բարձրորակ թեստերով՝ ապահովելով թեստավորման բարձր հավաստիություն։ Փաթեթում ներառված են նաև կոլպոսկոպիկ հետազոտությունը և, ըստ անհրաժեշտության, դրան հաջորդող լրացուցիչ հետազոտություններն ու բուժումը։